تحت كم الورد سبحه
و الخرز يتعد نبض
سر قولتك بس لمحه
لو علن ، كان الثواب انفض
مع كل حبايه بتفلت
تلقى حبايه نفس تزوغ مـ العد
حمولك فى ايديا تقلت
و الخيط على اخره خلاص انشد
قام انقطع
و الخرز فى الارض
مش هجمعك
و لا كنتى سنه
و لا كنتى فرض
هناك 4 تعليقات:
الشاعر الجميل
:))
بص هو المعنى بصراحة جميل جداً .. بس أنت رضخت للوزن شوية !
كان عمنا الكبير فؤاد حداد بيقول : القافية فتوح .
يعني ممكن وزن معين أو قافية معينة تأسرك فتنسج منها قصيدة جميلة .
أنت عندك فكرة حلوة أوي بس سجنتها بالوزن .
شوية ملحوظات ع الماشي .. البيت التالت مثلاً متهيألي إذا سمحت لي حضرتك كان هايبقى أخف لو اتقلب .. يعني مثلاً : قلتلك في السر لمحة .
البيت السادس .. "تلقى حباية نفس تزوغ م العد" حسيته تقيل ممكن تظبطه وتخللي البيت التامن "والخيط على آخره اتشد .
بالنسبة للقفلة موفقة لحد كبير وعجبتني جداً .
وعلى فكرة القصيدة كده مش وحشة ؛ ورأيي لا ينتقص أبداً منها .
أرجو أن تتقبل رأيي بصدر رحب .. وأنت حقيقي أسلوبك حلو ومبشر :))
دمت في كل ود وتألق وإبداع
:))
يا ريت تشيل كلمة التحقق من التعليقات !!!!!!!!!!
افتكرت أن الحنين بالبعد مات
أصبح عدم
أتاريه بيحسب حسبته
علشان يهز بضربته وقت السكات
زي اللغم
.
.
وتلقى نفسك ذكريات متفتفتة
أشلاء كتير متشتتة
بتحن للوقت اللي فات
بتصحي فيك حد اتعدم
.
.
تحفر تدور ع القديم
على ألف حلم كان يتيم
وكل حفرة تبتديها
قصادها حاضر يتردَم
وما فيش دموع راح تنفعك
ولا ينفعك كتر الندم
.
.
وتقول خلاص
مات الحنين
أصبح عدم
أتاريه بيحسب حسبته
علشان يهز بضربته وقت السكات
زي اللغم
###
عاوز رأيك فيها بصراحة
اكيد هقبل رأيك مهما كان رايك و بشكرك عليه جدا لو مهما كان بردو
تعرف ان الكلام اللى انت قولتلى ان الكلام اللى قولتلى اعدله فى القصيده كان اصلا هوه نفس الكلام اللى بتنصحنى بيه لكن بعد ما كتبت القصيده جيت اقولها لقيتها مش مزبوطه مع النفس اللى بقول بيه كلامى يعنى الكلام مش بيزبط مع انفاسى و انا بقول القصيده بطريقه معينه فبطر اعدل فيها
جامده جدا جدا
فكرتها جميله و تحس الاحداث و المشاهد فيها متستفه
خفيفه و لذيذه و فاتحه للشهيه و الكلام ساهل و بيجرى على لسانك و تمشى معاك و انتى مبسوط
جامده جدا تسلم
فى طبيعه دايما بلاحظها فى الذكور عموما و هيه انه يجى فى يوم و يقول انه مش بيهمه و انه قوى يستحمل و مفيش تانى يوم تلاقيه مدايق على الحاجه دى جدا ، دى فعلا طبيعه فى الذكور
و قصيدتك جميله جدا
إرسال تعليق